chehre pe gard pairon mein safar hai ke nahi hai
tu dekh ke meri manzil pe nazar hai ke nahi hai !
ja apne liye dhuundh le kisi ahl-e-mehal ko
na-jaane meri qismat mein ghar hai ke nahi hai
tere paas hain abhi aur dard toh vo bhi mujhe de
na puuch ke mujh mein aur sabar hai ke nahi hai
meri neendein toh marr chuki hain rat'jagaon ke haath
tere khaabon ko bhi koi aisa dar hai ke nahi hai !
ye soch ke le aaya hun main jangle se kuch jugnu
na jaane ab qismat mein sehar hai ke nahi hai
tu dekh mera shauq, meri shikaston ko na dekh
pedon tale tere ghar ki dagar hai ke nahi hai !
maanga hai tujhe rab se ke ik zid si hai kab se
dekhun toh meri duaon mein asar hai ke nahi hai !
No comments:
Post a Comment