aankhon mein jii mera hai idhar yaar dekhna
aashiq ka apne aakhari diidaar dekhna
kaisa chaman ke ham se asiiron ko mana hai
chaak-e-qafas se baagh ki diivaar dekhna
aankhen churaaiio na tuk abr-e-bahaar se
meri taraf bhi diidah-e-khuun_baar dekhna
ae ham-safar na aable ko pahunche chashm-e-tar
laga hai mere paaon mein aa khaar dekhna
hona na chaar chashm dik uss zulm-paishaah se
hoshiyaar ziinhaar khabardaar dekhna
sayyad dil hai daag-e-judaaii se rashk-e-baagh
tujhko bhi ho nasiib ye gulazar dekhna
gar zam_zamaa yahi hai koi din toh ham-safiir
iss fasl hi mein hamko giriftaar dekhna
bul-bul hamare gul pe na gustaakh kar nazar
ho jaayega gale ka kahin haar dekhna
shaayad hamari khaak se kuch ho bhi ae nasiim
girbaal kar ke kuucha-e-dildaar dekhna
uss khush-nigaah ke ishq se parahez kiijiyo 'meer'
jaata hai le ke jii hii ye aazaar dekhna
No comments:
Post a Comment