duniya mein hum pe jab koi ilzaam rakh diya
hum ne muqabil us ke tera naam rakh diya......
ik khaas had pe aa gayi jab teri berukhi
naam uska hum ne gardish-e-ayam rakh diya.......
main ladkhadaa raha hun tujhe dekh dekh kar
tune to mere samne ik jaam rakh diya....
kitna sitamzarif hai woh sahib-e-jamal
us ne diya jala ke lab-e-baam rakh diya.....
insan aur dekhe baghair us ko maan le
ik khauf ka bashar ne khuda naam rakh diya........
ab jis ke jee mein aaye wahi paaye roshni
hum ne to dil jala ke sar-e-aam rakh diya...
kya masalhat-shanas tha woh admi qateel
majburion ka jis ne wafa naam rakh diya.....