jo chahte ho, so kehte ho, chup rehne ki lazzat kya jano
ye raaz-e-muhabbat hai pyare, tum raaz-e-muhabbat kya jano....
alfaz kahan se laaun main, chhaale ki tapak samjhane ko
izhar-e-muhabbat karte ho, ehsas-e-muhabbat kya jano....
kya husn ki bheek bhi hoti hai, jab chutki chutki judati hai
hum ahal-e-garaz jaane is ko, tum sahib-e-daulat kya jano....
hai fark bara ae jaan-e-raza, dil dene mein dil lene mein
ulfat ka taalluk jante ho, rishte ki nazakat kya jano......