chalo kuch door yaad-e-raftigaan mein saath chalte hain
muhabat ke issi dard-e-nihan mein saath chalte hain
chalo ik baar chalte hain uss viraan basti mein
ussi kucha-e-tanha be_kasan mein saath chalte hain
lipat kar yaad kar lete hain ham bichdi waffaon ko
chalo uss mehfil-e-aah-o-figan mein saath chalte hain
kissi ujde huye hujre ki dahlizon pe rukte hain
kissi bikhre nagar be khanmaan mein saath chalte hain
jahan pe alvida kehte huye bichde thay ham dono
qamar aao ussi ujde makan mein saath chalte hain
No comments:
Post a Comment