gham ke maaron ki andheron mein basar hoti hai
sham-e-gham ki bhi kahin koi sahar hoti hai
ussko bhi gham ki tarah dil mein hi dafnate hain
kuch shikayat hamen apnon se agar hoti hai
dil bujha rehta hai muflis ke charagon ki tarah
ab issi tarah harik sham basar hoti hai
jis mein kante bhi bichen mod bhi har gaam pe aayen
hum malangon ki wohi raahguzar hoti hai
ashk jo jaate hain tareek shabon mein raushan
innhi ashkon ke sahare toh basar hoti hai
ik musafir bhi agar saaye se mehroom rahe
ae shajar ! iss mein bhi tauheen-e-shajar hoti hai
kis ne kab kaise guzari hain shaben roa roa kar
'dil' isski kahan unnko khabar hoti hai
No comments:
Post a Comment