duniya ne ham pe jab koi ilzam rakh diya
ham ne muqabil usske tera nam rakh diya
ik khas hadh pe aa gayi jab teri berukhi
nam usska ham ne gardish-e-ayyam rakh diya
main ladkhada raha hun tujhe dekh-dekh kar
tune toh mere samne ik jam rakh diya
kitna sitamzarif hai wo sahib-e-jamal
ussne diya jala ke lab-e-bam rakh diya
insan aur dekhe bagaiir ussko maan le
ik khauf ka bashar ne khuda nam rakh diya
ab jis ke jii mein aaye wahi paye raushani
hamne toh dil jala ke sar-e-aam rakh diya
kya maslahat shanas tha wo adami 'dil'
majburiyon ka jis ne waffa nam rakh diya
No comments:
Post a Comment