bana toh lenge aur aashian phir bhi
nazar mein phirta rahega ye gulistan phir bhi
nahin hai koi tere-mere darmiyan phir bhi
taalluqat mein pinah hai duuriyan phir bhi
zamiin ne apne tai kuch qasar nahin chhodi
meri talaash mein rehta hai aasman phir bhi
bohat samjhte hain khuddar apne aap ko hum
mila rahe hain magar unnki haan mein haan phir bhi
payaam unnke raqiibon ki marfat aaye
khitab mujhko kiya mere rajdaan phir bhi
gaye dinon ka tasvvur uddas karta hai
sukoon-e-jaan hain magar ye uddasiyan phir bhi
thehr na paaya ki ilzam mujhpe jhootha tha
magar uthate rahe log ungliyan phir bhi
isse nasiib kahoon main ki kam-nasiibi kahoon
jigar toh chaak hua, dil hai shadmaan phir bhi
zaban di hai toh farhaad bhi sunega vo
zaban na deta toh rehta main be_zaban phir bhi
charag hum toh ummidon ke phir jalayenge
agar ye hona hai ho jaaye raigaan, phir bhi
dimag unnka yaqiinan falaq pe rehta hai mujhe pasand hain bebaak ladkiyan phir bhi
sharab-o-aab toh kya ashq-e-khoon peete hain
na jaane payas hai kaisi, bujhi kahan phir bhi
khayal khanakharabon ka kaun rakhta hai
zahe-naseeb jo roya hai nauhkhwan[maut pe rone wala] phir bhi
mujhe ye ilm hai tu door ja basa hai ‘khayal’
kabhi toh mere qariib aa ae jaane-jaan phir bhi
No comments:
Post a Comment