main dukhi hun sab ye kehte hain khushi ki baat hai
ab andheron ki zaban par roshni ki baat hai
muddaton pehle juda hum apni marzi se huye
lag raha hai dil ko yun jaise abhi ki baat hai
hamne jab bhi dastan-e-shaunq chhedi doston
har kisi ko yeh laga jaise ussi ki baat hai
khamushi ne kis liye aawaz ka peecha kiya
ahl-e-duniya tum na samjhoge ye aisi baat hai
shehr mein ik shaks aisa hai jo sach ke saath hai
dhayan se kyun sun rahe ho, dillagi ki baat hai
No comments:
Post a Comment