andleeb shadani ki shayyiri

koi adaa_shanaas-e-muhabbat hamen bataaye
jo ham ko bhuul jaaye vo kyon ham ko yaad aaye
kis ki majaal thi ki hijaab-e-nazar uthaaye
vo muskura ke aap hi dil ke qariib aaye
ik dil_nashin nigaah mein allaah ye khalish
nashtar ki nok jaise kaleje mein tuut jaaye
kuch hamse bekhudi mein hui behijaabiyan
chashm_kazani sitaaron ne ki phuul muskuraaye
vo jaan-e-aarzu ke hai sarmaaya-e-nishaat
kyon usski yaad gham ki ghata ban ke dil pe chhaaye
tum toh hamin ko kehte thay ye tumko kya hua
dekho kanwal ke phuul se shabnam chhalak na jaaye
ik naatmaam khwab mukmmal na ho saka
aane ko zindgi mein bohat inqalaab aaye

andleeb shadani ki shayyiri

der lagi aane mein tumko shukr hai phir bhi aaye toh
aas ne dil ka saath na chhoda waise ham ghabaraaye toh
shafaq dhanak mahtaab ghataayen taare nagmen bijali phuul
uss daman mein kya kya kuch hai vo daman haath mein aaye toh
chahat ke badle mein ham toh bech den apni marzi tak
koi mile toh dil ka gahak koi hamen apnaaye toh

kyun ye mihr_angez tabassum madd-e-nazar jab kuch bhi nahin
haaye agar koi anjaan agar iss dhoke mein aa jaaye toh
suni sunaai baat nahin hai apne oopar beeti hai
phool nikalte hain sholon se chahat aag lagaaye toh
jhooth hai sab tareekh hamesha apne ko dohraati hai
achchha meraa khwab-e-jawani thoda sa doharaaye toh
nadaani aur majbuuri mein yaaro kuch toh farq karo
ek bebas insaan kare kya tuut ke dil aa jaaye toh