khalil ur rahman azmi ki shayyiri

tarz jeene ka sikhati hai mujhe
tishngi zehar pilaati hai mujhe
raat bhar rehti hai kis baat ki dhun
na jagati hai na sulati hai mujhe
ruuthata hun jo kabhi duniya se
zindgi aa ke manati hai mujhe
aaiina dekhun toh kyunkar dekhun
yaad ik shaks ki aati hai mujhe
bandh karta hun jo aankhen kya kya
roshni si nazar aati hai mujhe
koi mil jaaye toh rasta kat jaaye
apni parachaai daraati hai mujhe
ab toh ye bhuul gaya kis ki talab
des pardes phirati hai mujhe
kaise ho khatam kahani gham ki
ab toh kuch neend si aati hai mujhe

khalil ur rahman azmi ki shayyiri

rukh mein gard-e-malaal[dust of sorrow] thi kya thi
haasil-e-maah-o-saal thi kya thi
ek surat si yaad hai ab bhi
aap apni misaal thi kya thi
mere jaanib uthi thi koi nigaah
ek mubaham[vague] sawal thi kya thi
ussko pa kar bhi ussko pa na saka
justju-e-jamaal thi kya thi
dil mein thi par labon tak aa na saki
aarzu-e-visal thi kya thi
umar bhar mein bas ek baar aayi
sa'at[moment]-e-lazaval thi kya thi
koi khvahan[desirous] na tha ki jins-e-hunar[art things]
ek muflis[poor] ka maal thi kya thi

khalil ur rahman azmi ki shayyiri

jalata nahin aur jal raha hun
kis aag mein main pighal raha hun
mefaluuj[useless] hain haath-paanv mere
phir zahan mein kyun chal raha hun
raayi ka bana ke ek parbat
ab iss pe khud hi phisal raha hun
kis haath se haath main milaaun
ab apne hi haath mal raha hun
kyon aaiina baar baar dekhun
main aaj nahin jo kal raha hun
ab kaun sa dar raha hai baaqi
uss dar se kyon main nikal raha hun
qadamon ke tale toh kuch nahin hai
kis cheez ko main kuchal raha hun
ab koi nahin raha sahara
main aaj se phir sambhal raha hun
ye barf hataao mere sar se
main aaj kuch aur jal raha hun