ganesh bihari tarz ki shayyiri

mujhe de ke mai mere saaqiya meri tishnagi ko hawa na de
meri pyas par bhi toh kar nazar mujhe maikashi ki saza na de
mera saath ae mere ham_safar nahin chahta hai toh jaam de
magar iss tarah sar-e-rah_guzar mujhe har qadam pe sada na de
mera gham na kar mere charagar teri charaajo_i baja magar
mera dard hai meri zindgi mujhe dard-e-dil ki dawa na de
main vahan hun ab mere naaseha ki jahan khushi ki guzar nahin
mera gham hadon se guzar gaya mujhe ab khushi ki dua na de
vo giraayen shauq se bijaliyaan ye sitam karam hain sitam nahin
ke vo 'tarz' barq-e-jaffa nahin jo chamak ke nuur-e-vaffa na de

ganesh bihari tarz ki shayyiri

ik zara dil ke qariib aao toh kuch chaiin pade
jaam ko jaam se takaraao toh kuch chaiin pade
baithe baithe toh har mauj se dil dehalega
badake tufan se takaraao toh kuch chaiin pade
jii ulajhta hai nagma-e-rangeen sun kar
geet ek dard bhara gaao toh kuch chaiin pade
daag ke sher jawaani mein bhale lagate hain
meer ki koi gazal gaao toh kuch chaiin pade
yaad-e-ayaan mein guzishtan se ijaazat le kar
'tarz' kuch der ko soa jaao toh kuch chaiin pade

ganesh bihari tarz ki shayyiri

beniyaaz-e-sahar ho gayi
sham-e-gham moatabar ho gayi
ik nazar kya idhar ho gayi
ajnabi har nazar ho gayi
zindgi kya hai aur maut kyaa
shab hui aur sahar ho gayi
unnki aankhon mein ashk aa gaye
daastan mukhtasar ho gayi
chaar tinke hi rakh paaye thay
bijaliyon ko khabar ho gayi
chhid gayi kis ki daman ki baat
khud_b_khud aankh tar ho gayi
unnkii mehfil se uthakar chale
raushani ham_safar ho gayi
'tarz' jab se chhuta karavan
ziist gard-e-safar ho gayi