shahab qaiser ki shayyiri

atish-e-ishq ka shikar huye
hum pe kuch raaz aashkaar huye
kaun chahe nikaalna innko
teer jo dil ke aar paar huye
vo bhi ghabra rahe thay milne se
be-hawas hum bhi baar baar huye
pagriyaan gaam gaam bikti hain
ab toh aisai bhi kaarobaar huye
ek hum hi se parda kya karna
taalib-e-deed toh hazar huye
jholiyan kis tarah bhare koi
jab ki daaman hi taar taar huye
vo jo kal tohmaten lagaate thay
aaj ruswa sar-e-bazaar huye
mere aansoon ka ye asar hai 'shahab'
ret ke shahr laalaazaar huye