vo ahad ahad hi kya jise nibhaao bhi

vo ahad ahad hi kya jise nibhaao bhi
hamare vaada-e-ulfat ko bhuul jaao bhi
bhala kahan ke ham aise gumaan wale hain
hazaar baar ham aayen hamen bulaao bhi
bigad chala hai bahut rasm-e-khudkushi ka chalan
daraane walo kisi roz kar dikhaao bhi
tumhari niind mein duubi hui aankhon ki qasam
hamen ye zid hai ki jaago bhi aur jagaao bhi

rokta hai gham-e-izhar se pindaar mujhe

rokta hai gham-e-izhar se pindaar mujhe
mere ashkon se chhupa le mere rukhsar mujhe
dekh ae dasht-e-junoon bhed na khulne paaye
dhuundhane aaye hain ghar ke dar-o-diwar mujhe
sii diye hont ussi shakh ki majbuuri ne
jiski qurbat ne kiya maharam-e-asraar mujhe
meri aankhon ki taraf dekh rahe hain anzum
jaise pehchan gayi ho shab-e-bedaar mujhe
jins-e-viraani-e-sahara meri dukan mein hai
kya kharidega tere shahr ka baazar mujhe
jaras-e-gul ne kai baar bulaaya lekin
le gayi raah se zanjiir ki jhankar mujhe
naavak-e-zulm utha dashna-e-andoh sambhal
lutf ke khanjar-e-benaam se mat maar mujhe
saari duniya mein ghani raat ka sanata tha
sahan-e-zindan mein mile subah ke aasaar mujhe

aandhi chali toh naqsh-e-kaf-e-paa nahin mila

aandhi chali toh naqsh-e-kaf-e-paa nahin mila
dil jis se mil gaya vo dubara nahin mila
aawaz ko toh kaun samajhta ki duur duur
khamoshiyon ka dard-shanaasa nahin mila
ham anzuman mein sab ki taraf dekhte rahe
apni tarah se koi akela nahin mila
kachche ghade ne jeet li nadi chadhi hui
mazbuut kashtiyon ko kinara nahin mila

mustafa zaidi ki shayyiri

koi hum-nafas nahin hai koi raazdaan nahin hai
faqat ek dil tha apna, so vo mehrbaan nahin hai
kisi aur gham mein itni khalish-e-nihaan[secret pain] nahin hai
gham-e-dil mera rafiqo, gham-e-raayegaan[useless suffering] nahin hai
meri ruuh ki haqiiqat mere aansuon se puchho
mera majlisi[public] tabassum, mera tarjuman[manifestation] nahin hai
kisi aankh ko sada do, kisi zulf ko pukaaro
badi dhuup pad rahi hai, koi saayebaan nahin hai
innhi patharon pe chal kar agar aa sako toh aao
mere ghar ke raaste mein koi kehkashan[galaxy] nahin hai