abdullah kamal ki shayyiri

usski jaam-e-jam aankhen shiisha-e-badan mera
usski band mutthi mein saara baankpan mera
aao aaj ham donon apna apna ghar chun len
tum tabaah-e-dil le lo khitta-e-badan mera
maine apne chehre pe sab hunar sajaaye thay
faash[reveal] kar gaya mujhko saada pairhan mera
dil bhi kho gaya shayad shahr ke saraabon mein
ab meri tarah se hai dard bevatan mera
ek dasht-e-khamoshi ab mera muqaddar hai
yaad besada teri zakhm be_chaman mera
roz apni aankhon ke khwab khuun karta hun
haaye kin ganiimon[enemy] se aa pada hai ran[fight] mera
magrabi[western] hawa ne phir ye sandesha bheja hai
muntazir[waiting] tumhara hai khushbuon ka ban mera

abdullah kamal ki shayyiri

din chadhe aur bikhar jaaun
raat utre toh main ghar jaaun
bohat ehsaas hai hone ka
itna zinda hun ke marr jaaun
main zamiin-daadah[inhabiting land] sahi phir bhi
aasman sa hun jidhar jaaun
vahi be-chehragi har suu hai
aaina hun main, kidhar jaaun