saud usmani ki shayyiri

abr malboos-e-aab tha jaise
chaand ko kuch hijaab tha jaise
kal achanak vo yun mila mujhko
koi pinhaan jawab tha jaise
safha safha safar tha yaadon ka
jalti bujhti kitaab tha jaise
adh-khili raat, un_kahe manzar
rasta neem_taab tha jaise
chandni mein tuloo' hota hua
raat ka aftab tha jaise
gehri tarekiyon mein behta hua
ek roshan gulab tha jaise
raat bhar mere aariz-o-lab par
bosa-e-mahtab tha jaise
uss ki awaaz neem-khwabeeda
phool saa zeir-e-aab tha jaise
soa ke uttha toh meri aankhon mein
usski aankhon ka khwab tha jaise

saud usmani ki shayyiri

ikhtalaaf ki saa'at

tumhari baat dil-e-sakht-jaan ko cheer gayi
kisi ne zakhm pe nashtar chala diya jaise
ragon mein khuun ki tapish barq ban ke daud gayi
charagh barf ke ghar mein jala diya jaise
kuch aisi baat nahin thi ke la_jawab thay hum
khamosh log kabhi itne be_zuban bhi na thay
sukhan ki dhaar baratni hamen bhi aati thi
tumhare paas jo nashtar thay kam yahan bhi na thay
vo jin ke zakhm tumhen daaimi khalish de den
vo teer kam na thay aur haath be_kamaan bhi na thay
magar khayal raha guzri saa'aton ka hamen
tumhare pyar ka jab humne aitbaar kiya
ye baat soch ke dil aur ho gaya ghayal
ke tum wwohi ho sada jis ko humne pyar kiya
kisi khayal-e-karam hi se dil sambhaal liya
agarche zehan ne dil ko hazar jhuthlaya
vo ek pal toh hamen dagmaga gaya lekin
phir apne aap ko dekha toh mu'tadil paaya
so humne sheesha-e-dil se gubhar saaf kiya
so humne ek hi pal mein tumhen muaaf kiya !

saud usmani ki shayyiri

bichad gaya hai toh ab uss se kuch gila bhi nahin
ke sach toh ye hai vo ik shakhs mera tha bhi nahin
main chahta hun usse aur chahne ke siva
mere liye toh koi aur raasta bhi nahin
ajeeb raah guzar thi ke jis pe chalte huye
qadam ruke bhi nahin rasta kata bhi nahin
dhuaan sa kuch toh miyaan ! barf se bhi uthta hai
so dil-jalon ka ye aisa koi pata bhi nahin
ragon mein jamte huye khuun ki tarha hi 'saud'
vo harf-e-hizr jo uss ne abhi kaha bhi nahin