sikandar ali wajd ki shayyiri

khush-jamaalon ki yaad aati hai
be-misaalon ki yaad aati hai
baais-e-rashk[cause of envy]-e-mah'r-o-maah thay jo
unn hilaalon[new moon] ki yaad aati hai
jinse duniya-e-dil munavvar[luminous] thi
unn ujalon ki yaad aati hai
jinki aankhon mein tha suroor-e-ghazal
unn ghazlon ki yaad aati hai
saadgi laa-jawab hai jinki
unn sawalon ki yaad aati hai
zikr sunte hain nau-jawani ka
kuch khayaalon ki yaad aati hai
jaane wale kabhi nahin aate
jaane walon ki yaad aati hai
'wajd' lutf-e-sukhan mubaarak ho
baa-kamaalon ki yaad aati hai