zikr-e-shab-e-firaaq se vahashat usse bhi thi
meri tarah kisi se muhabbat usse bhi thi
mujh ko bhi shauq thaa naye cheharon ki diid ka
rastaa badal ke chalane kii aadat usse bhi thi
uss raat der tak vo rahaa mahv-e-guftaguu
masruuf main bhi kam thaa faraagat usse bhi thi
sunataa thaa vo bhi sab se puraani kahaniyaan
taazaa rafaaqaton ki zaruurat usse bhi thi
mujh se bichhad ke shahar main ghul-mil gayaa vo shakhs
haala'nke shahar bhar se raqabat usse bhi thi
vo mujh se badh ke zabt kaa aadi tha jii gaya
varna har ek saans qayamat usse bhi thi