asoolon pe jahan anch aaye thukrana zaroori hai
jo zinda hon tu phir zinda nazar aana zaroori hai
nayi umron ki khudmukhtaryon ko kaun samjhaye
kahan se bach ke chalna hai kahan jana zaroori hai
thake haare parinde jab basere ke liye lote
saleeqamand shakhon ka lachak jana zaroori hai
bohut bebak ankhon main taluq theek nahi hota
mohabbat mei kashish rakhne ko sharmana zaroori hai
saleeqa hi nahi shayad use mahasoos karne ka
jo kahta hai Khuda hai toh nazar ana zaroori hai
mere honton pe apni pyas rakh do aur phir socho
ki iss ke baad bhi duniya mein kuch paana zaroori hai