meri jaan-o jigar si lagti hai
tu meri ham-safar si lagti hai
main hoon bimar-e mohabbat aye dost
tu magar be-khabar si lagti hai
waan to shabnam se sarfaraz hai gul
dil pe yaan aag barsi lagti hai
mere dil ki zamiin sooni hai
zindagi bhar ki tarsi lagti hai
meethhi baaton se door rahta hoon
ab ye mujhko, zahar si lagti hai
zakhm khaye hain itne seene par
aah lene mein , dar si lagti hai
ashk aankhon se bahe hain shayad
ye meri chashm, tar si lagti hai
mareez-e ishq ka ilaaj nahin
har dawa be-asar si lagti hai
aakhiri waqt mud ke dekha to
zindagi mukh-tasar si lagti hai
main Chiraagh-e Sehar ke jaisa "Seraj"
tu bhi najmus-sehar si lagti hai
No comments:
Post a Comment