tuti hai meri neend magar tumko isse kya
bajte rahe hawaon se dar, tumko isse kya
tum mauz mauz misle-saba ghumte raho
kat jayen meri soch ke par, tumko isse kya
auron ka haath thamo, unnhen raasta dikhao
main bhool jaun apna hi ghar, tumko isse kya
abr-e-gurezpa[running cloud] ko barsane se kya garaz
seepi mein ban na paaye guhar[moti], tumko isse kya
le jaayen mujhko maale-ganimat[luut ka maal] ke saath udu[dushman]
tumne toh daal di hai sipar[hathiyar], tumko isse kya
tumne toh thak ke dasht mein kheme laga liye
tanha kate kisi ka safar, tumko isse kya
No comments:
Post a Comment