chatri laga ke ghar se nikalne lage hain hum
ab kitni ehtiyaat se chalne lage hain hum
iss darje hoshiyar toh pehle kabhi na thay
ab kyun qadam qadam pe sambhalne lage hain hum
ho jaate hain uddas ke jab dophaar ke baad
suraj pukarta hai ke dhalne lage hain hum
aisa nahin ke barf ki maanind ho magar
lagta hai yun ke jaise pighalne lage hain hum
aaiina dekhne ki zaroorat na thi koi
khud jante thay hum ke badlne lage hain hum
isska yaqeen aaj bhala kisko aayega
ek dheemi dheemi aanch mein jalne lage hain hum
No comments:
Post a Comment