jo dard chupa rakha tha duniya ki nazar se
ab hone laga sab pe a'yaan deeda-e-tar se
diwanon ko kab mauj-e-gham-e-dil ka koi khauff
tufaan chala aaye idhar se ya udhar se
gair aaj bhi izzat se hamen dekh rahe hain
apnon ne giraya hai hamen apni nazer se
woh paaon ke chhale ho ke ho raah ke kante
sab haar ke baithe hain mere amz-e-safar se
ik tu hi nahin raah raw-e-raah-e-gham-e-ishq
guzre hain tere baad bhi kuch log idhar se
ae baad-e-saba itna mere dost se keh de
aankhon ko bichaaye hai koi pichle pehar se
main apni hi mayyat pe khada soch raha hun
ae kaash nikalta yeh janaza tere ghar se
ae 'sadik' kis tarah guzre hain shab-e-roz
puche koi aa kar meri diwaron se, dar se
No comments:
Post a Comment