kisi ki bewafai bais-e-herat nahin hoti
zara sa dil toh dukhta hai magar shiddat nahin hoti
bohat khud ko jalata hun ye barson ki riazat hai
mere andar ki lekin duur ye zulmat nahin hoti
yeh dukh hai ki kisi ne bhi hamen dil se nahin chaha
zara sa pyar mil jata toh yeh halat nahin hoti
zamiin-o-aasman mein ik talluq toh hai sadiyon se
magar paida kahin bhi rabt ki surat nahin hoti
ajab hi falsfa hai ye ameeri aur garibi ka
ke umrein sarf ho jaati hain kam gurbat nahin hoti
bohat se khuub chehre hain bohat si dilruba nazrein
tere hone se hoti thi jo kefiat nahin hoti
hawala jab talak tera na aa jaaye kahin inn mein
mere sheron mein paida tab talak jiddat nahin hoti
tere gumnaam mar jaane mein 'azhar' kya burayi hai
ki har insaan ki qismat mein toh shohrat nahin hoti
No comments:
Post a Comment