baat karni mujhe mushkil kabhi aisi toh na thi
jaisi ab hai teri mahfil kabhi aisi toh na thi
le gaya cheen ke kaun aaj tera sabr-o-qarar
beqarari tujhe ae dil kabhi aisi toh na thi
chashm-e-qatil meri dushman thi hamesha lekin
jaise ab ho gayi qatil kabhi aisi toh na thi
unnki ankhon ne khuda jaane kiya kya jaadu
ke tabiyat meri mael kabhi aisi toh na thi
aks-e-rukh-e-yaar ne kis se hai tujhe chamkaya
tab tujh mein mah-e-kamil kabhi aisi toh na thi
kya sabab tu jo bigadta hai "zafar" se har bar
khu teri hur-e-shamail kabhi aisi toh na thi
No comments:
Post a Comment