tujhe khabar hai tujhe sochne ki khatir
bohut se kaam muqadar pe taal rakhte hain
koi bhi faisla hum soch kar nahin karte
tumhare naam ka sikka uchaal rakhte hain
tumhare baad ye aadat si ho gayi apni
bikharte sukhte patay sambhal rakhte hain
khushi si milti hai khud ko azyatein de kar
soo jan-bujh kar khud ko nidhal rakhte hain
tumhare hijar mein ye haal ho gaya apna
kisi ka khat ho, usse bhi sambhal rakhte hain
khushi mile toh tere baad khush nahi hote
hum apni aankh mein har dam malaal rakhte hain
kuch is liye bhi toh be-haal ho gaye hum log
tumhari yaad ka be-hadd khayal rakhte hain
No comments:
Post a Comment