dil dhadkne ka sabab yaad aaya
vo teri yaad thi, ab yaad aaya
aaj mushkil tha sanmbhal na.. ae dost
tu musibat mein ajab yaad aaya
haal-e-dil hum bhi sunate lekin
jab vo rukhsat huye, tab yaad aaya
din guzara tha badi mushkil se
phir tera wada-e-shab yaad aaya
phir kai log nazar se guzre
phir koi shehr-e-tarab yaad aaya
baith kar saaya-e-gul mein 'nasir'
hum bahut roye, wo jab yaad aaya
No comments:
Post a Comment