gir gaya rait ke khwabon ka gharonda ik aur
beh gaya sail-e-haqiqaat mein, fasana ik aur
pehle bhi khai thi ik dast-e-maseeha ne shikast
aaj naakaam hua dast-e-maseeha ik aur
daam-e-haalat se nikle hi thay hum log ke phir
daam takdeer ne raahon mein bichaya ik aur
ho gaya chaak kahin koi girebaan phir se
mil gaya khaan mein husn-e-rukh-e-zaiba ik aur
phir koi laila hui qasr-e-riwayat mein aseer
phir hua qais soo-e-dasht rawaana ik aur
gham-e-halaat tha, ab mujhko gham-e-ishq bhi hai
ho gaya hashr meri zaat mein barpa ik aur
phir nayi samt mein aaghaz-e-safar hai 'zeeshan'
chalte chalte kahin gum ho gaya jaada ik aur
No comments:
Post a Comment